વ્યારાના મીરપુર-કરંજવેલ રસ્તા ઉપરથી પસાર થતી ખેરના લાકડા ભરેલી શંકાસ્પદ પીકઅપનો પીછો કરતા વનકર્મચારીઓને કારચાલકે અવરોધ ઉભો કરી ગાડીને અટકાવનાર મીરપુરના શખ્સ સામે પોલીસ મથકે ફરિયાદ નોંધાઈ છે. આ શખ્સ લાકડા ચોરોને મદદ કરતો હોવાનું જણાયું હતું.
મળતી માહિતી મુજબ વ્યારા વન વિભાગના કરંજવેલ બીટમાં ફરજ બજાવતા વન રક્ષક સહાયક જીગરભાઈ મકવાણા તથા અન્ય એક કર્મચારીએ તા.0૭-0૯-૨૦૨૫ના રોજ બાતમી મળી હતી કે, મીરપુર ગામ તરપથી એક પીકઅપ ગાડી ખેરના લાકડા ભરીને વ્યારા તરફ આવવા નીકળી છે, જેથી બાતમી મુજબ સરકારી મોટરસાયકલ ઉપર પીકઅપ ગાડીને ઝડપી પાડવા પીછો કરતા હતા, તે દરમિયાન કરંજવેલ ડેરીથી બાલપુર રસ્તા ઉપર સ્વીફટ ગાડીનો ચાલક રાહુલભાઈ ગામીત (રહે.મીરપુર)એ પોતાની કાર રોંગ સાઈડે હંકારી લાવી વનરક્ષક સહાયકોની મોટરસાયકલને ગેરકાયદેસર અવરધ કરી તથા મોટરસાયકલને ઓવરટેક કરી મોટરસાયકલની આગળ-આગળ પોતાની કાર હંકારી ખેરના લાકડા ભરેલી પીકઅપનો પીછો કરવામાં અવરોધ કર્યા હતા.આ બનાવમાં વનકર્મચારીઓના ફરજમાં અડચણ ઉભી કરનાર રાહલુ ગામીત સામે વન રક્ષક સહાયક જીગરભાઈએ વ્યારા પોલીસ મથકે ફરિયાદ નોંધાવી છે.
