વાલોડ તાલુકાના કહેર ગામ પાસે સોમવારે રાત્રે રસ્તા પર કોઈપણ જાતની પાર્કિંગ લાઈટ કે રિફ્લેક્ટર વગર ઊભેલા ટ્રેક્ટરની ટ્રોલી પાછળ મોટરસાયકલ અથડાતા 30 વર્ષીય યુવકનું ઘટનાસ્થળે જ કમકમાટીભર્યું મોત નીપજ્યું છે.મળતી માહિતી મુજબ, કહેર ગામના તાડ ફળીયામાં રહેતો તેજશકુમાર સુરેશભાઈ ચૌધરી (ઉં.વ.30) સોમવારે રાત્રે પોતાની CBZ મોટરસાયકલ GJ-06-CG-4110 પર મઢી બાજુથી ઘરે પરત ફરી રહ્યો હતો.
આ દરમિયાન કહેર ગામની પાણીની ટાંકી પાસે રસ્તા પર એક ટ્રેક્ટર-ટ્રોલી ટ્રેક્ટર નં. GJ-26-AE-7591 અને ટ્રોલી નં. GJ-26-T-9125 ઊભું હતું. આરોપી ટ્રેક્ટર ચાલક શશીકાંતભાઇ રાજેન્દ્રભાઇ ગામીતે ટ્રેક્ટરને રસ્તા પર જોખમી રીતે પાર્કિંગ લાઈટ કે રિફ્લેક્ટર રાખ્યા વગર ઊભું રાખ્યું હતું.અંધારામાં ઊભેલું ટ્રેક્ટર ન દેખાતા તેજશકુમારની બાઇક સીધી ટ્રોલીના પાછળના ભાગે ધડાકાભેર અથડાઈ હતી. આ અકસ્માતમાં તેજશને માથાના ભાગે ગંભીર ઈજાઓ પહોંચતા તેને તાત્કાલિક વ્યારા જનરલ હોસ્પિટલ ખસેડાયો હતો, જ્યાં ફરજ પરના ડોક્ટરે તેને મૃત જાહેર કર્યો હતો. મૃતકના કાકા જગદેવભાઈ ભાવસીંગભાઈ ચૌધરીએ આ મામલે વાલોડ પોલીસ સ્ટેશનમાં ફરિયાદ નોંધાવી છે.
