કપરાડાનાં નાનાપોંઢા પોલીસ મથકના સ્ટાફ દ્વારા ગત રોજ કરવામાં આવેલ પેટ્રોલિંગ દરમિયાન વિદેશી દારૂનો જથ્થો ઝડપી પાડવામાં આવ્યો છે. પોલીસને મળેલી બાતમીના આધારે કાકડકોપર ચીકાર ફળીયા પાસે વોચ ગોઠવવામાં આવી હતી.
આ દરમિયાન સેલવાસ તરફથી આવતી સફેદ કલરની મારૂતિ ઓમની વાન નંબર GJ-15-CD-4192ને રોકવાનો પ્રયાસ કરતા ચાલકે ગાડી ઉભી રાખી ન હતી. પોલીસ દ્વારા પીછો કરવામાં આવતા અંધારાનો લાભ લઈ ચાલક ઝાડીઓમાં નાસી છૂટ્યો હતો. ગાડીની તપાસ કરતા તેમાંથી ભારતીય બનાવટની વિદેશી દારૂની બાટલીઓ અને ટીન બીયરનો જથ્થો મળી આવ્યો હતો. પોલીસે રૂ.13,080/-ની કિંમતનો દારૂ અને રૂ.60,000/-ની કિંમતની મારૂતિ વાન મળી કુલ રૂ.73,080નો મુદ્દામાલ કબજે કર્યો છે.
